تعبت يا مصر!!

يا حضن بيسعني..وإحتجت له وباعني..ساعة ما مد إيديه..شاور وودعني..

إيه يا مصر؟!!

إيه يا حبيبتي؟!!

مش كفايه كده؟!! تعبنا والله..العيال تعبت.. وهما مش متعودين على كده!!

طيب ساعديهم طيب .. طيب بلاش العيال..

الشعب الغلبان ده..ده شعبك يستاهل لبن العصفور والله..شعبك بيحبك..ومترمط في حبك .. 

هوا صحيح الحب ما يبقاش حب من غير مرمطه..بس برضه الحب من طرف واحد ما ينفعش..هيمووت هيمووت..

وأنا عارفه إنك بتحبينا .. أيوه بتحبينا .. وبتدلعي علينا .. بس كفااايه كده وحياة أبوكِ يا شيخه..

هااتي أمااره واحده على حبك.. وإحنا نكمل كدا !!!!!

حكاوي..

ضُمّيني يا أم الخدود الحُمر..

ضمّيني يا أم العيون السُّود..

قولي بفخرك لكل البشر..

إحنا ما يفرّق ما بينا حسود..

/

/

/

إحنا اللي بنعلّم شعوب العالم..

إزاي نحارب , وإزاي نسالم..

إزاي نعيش ملايين,وقلبنا واحِد..!

وإزاي نبيع عمرنا ..عشان هدف واحد..

وفي كل عتمة ليل..بنشكر إلـه واحد..

/

/

/

قولي لكل الناس..هيفضل ما بينا أمان..

وعايشه فينا المحبه..مابين جرس وأدان..

وإللي يحرق ويقتل..خاين مهوش إنسان..!

عايش في توب بطل..وهو أصله جبان..

/

/

/

يا مصر قولي وعيدي

الأمن مكتوبلي..

ده ربنا وعدُه

ف كتابه مشهودلي..

يا مصر إنتي جنّه

ونار ع المفسدينْ..

الحب ف دمّ شعبك

مش كلمه ده أصله "ديــنْ"..!

/

/

/

ضُمّيني كمان وكمان..

يا أم الخدود الحمر..

وقولي لكل البشر..

الحب إتخلَق من "مصـــر" ..

/

/

/

8/5/2011